06 January 2012 ni ah Chin National Front (CNF) nih Kawrlam ralkap cozah sinah Kahdohnak ngolnak min a thut ni tiah tuanbia thar Chinmi nih kan ttial.
Kawl Cozah leiin phung tling in hun thlahmi hna he ni hnih chung i ceihhmainak an ngeih hnu ah kap hnih lungtling in Ceasefire hnatlaknak min an thut cu a si.
Kaphnih lei in hun thlahmi aiawhtu hna nih an i ceihkhannak an lungtlin hnu ah kahdohnak ngol ding hnatlaknak cu catlap cungah minsenthut a si, tiah Chinland Guardian nih a chim.
CNF aiawhtu le kahdaihnak caah hruaitu a simi Dr, Sui Khar nih minsen a thut i Kawl ralkap cozah leiin Aung Min le Chinram Uktu Hung Ngai zong nih minsen cu an thut ve. Cu pinah, hi itonnak kongah tet-te bantuk in a dirmi Chinmi chungin biaknak lei upa cheukhat hna zong nih minsen an thut ve tiah CG nih cun a chim chih.
Hnatlaknak an ngeih lakah biapi pathum a simi cu, CNF nih Matupi, Thantlang le Tedim hna ah zung ngeih ding. Chinram ramri cu a chaklei bik Tedim in a tangbik Paletwa ramri tiang CNF cawlcanghnak hmunhma (operational base area) ah hngalhpinak ngeih ding. Cun, hi minsen an thut hnu zarh hnih chungah hmailei i ramkomhbu cozah he iton tthannak ding ni le thla fianh ding hna an si.
Caan karlak ah zanriah dumttinak an ngei lai. Chinram chung in cozah rianttuan a simi hna, Hakha, Thantlang le Falam in mipi caah rianttuantu hna kha sawm an si.
CNF aiawhtu hna cu thaizing 07. Jan in Hakha an chuahtak lai i Thantlang ah zankhat an riah hnu ah Ramri lei ah an lan te lai, tiah Chinlandguardian nih a chim.
Choosing web hosting is always a challenge, please consider this hostmonster review and greengeeks review.
Kah-Ngolnak Biatlang Hna Relnak
Ciin Rung tlang thladem i Hakha khualipi ah remdaihnak caah kah-ngolnak kaphnih hnatlaknak cu CNF le Chin State cozah nih January ni 6, 2012 ni ah an vun tuah khawh cang. Mah hi tin an tuah khawh mi thil hi men-mai lomi, roling thil pakhat a si. Chinland tuanbia ah roling ding thil, tuanbia thar tialmi a si. Khat lei ah Chin miphun pi nih Chin National Revolution movement ah zeitluk dah ttanpinak an ngeih timi cu Thantlang le Hakha ah thongtampi mipi hna nih lungrual tak tak in an langhter. Mah ttin kah-ngolnak caah CNF le Chin State cozah tonnak hi a min hmanh bunh phu a si. Lung duh ah cun "Ruung Tlang Agreement" tbtk or "Hakha Threaty" tbtk in tuanbia ah ciin ken awk tha deuh ding khin. Tutan ah an i ceihmi thil hna hi number in an vun bunh thluahmah tik ah biatlang number (9) tiang ai tel. (Mah ka hin rel khawh si) Mah hi an ceihmi hna lak ah uar um cemmi pawl, critical simi hna, afiang huaha deuh lo mi hna, pehzulh ding atang rihmi thilhna tiin an um len.
Uar um cemmi hnatlaknak
Number (3)nak: CNA ralkap hna CNF chungtel hna cu hriam i ken lo in, zalong tein Union ram chung khawika paoh ah an kal chukcho kho. Mah hi thil nih hin thil tampi a thlen lai tiah ruahchanhnak a um. CNA nih recruit tuah ding ah hraimnam si lo in, tingtang le zai hla in khua kip ah an kal kho tinak a si. Mipi nih tihmi si lo in, mipi nih uarmi, mipi a bawm chantu ding ah heh tiah rian an tuan kho chin chin lai tinak a si. Kawl cozah ralkap belte cu an thuam he an meithal he lawr tak in pawtaw an au rih ko lai maw dik? Zei si zong ah kei tanbo ka hmang lai nang kut lawng in na um lai ti phun zong khi a lo pah nain, cu pawl cu mah hnatlaknak i thazang dernak kamkhat lei si ve hnga i, thil tha a chuah pi ding tu kha a ngan deuh tihi hmuh khawh si.
Number (2nak): Thiltha pakhat umrih mi cu Laitlang khua hna simi Zangtlang, Tlangpi, Dawn khua ram hna ah CNA/F cu umnak nawl an ngei cang. Tidem peng Zimpi khua, Bukphir khua cun Paletwa ram Kungpin khua, le Mara ram Para le Pathian Tlang khua hna ah CNA/F cu umnak nawl pek ding caah a cunglei nawlngeitu hna sin ah bia hal hnu ah thawng thanh than ding ti a um rih. Number(5nak): Mah hi hnatlaknak tuah khawh in, ramchung ramleng Chin mipi hna he CNF cu zalong tein tonbiaruahnak (consultation) tuah khawh siseh ti um rih. Number (7nak): Union of Burma cozah nih bomh mi Special Economic Zone cu CNF hruainak in tuah ding.
Adang Dang
Number (6nak): International NGO hna Chin State chung ah zalong tein rian tuanter ding hnatlaknak zong aum. Mah hi zong hi khuaruah har in a thami a si. NGO tampi Laitlang ah kai ter an senh lomi an um len rih. NGO zei mawzat zong cu Chin State ah an lut kho ko cang. NGO ngawl neihnak a petu belte hi Chin State cozah nak in Foreign Ministry le adang ministry hna nih central cozah power hmang in an tlaih tawn i tu zong cu Mah Sah Lah chan lio i Ministry pawl mah tining tein chiah peng si ko caah, centralization nin a temtawnnak tete zong cu hmai lei ah phishin chap ding tam lengluang rih lai cu. Cu pin ah, Laitlang ah bing ciinnak, bing chawletnak hna kan doh lai tbtk hnatlaknak hna hi khuaruah har thiltha a si. UNO nih siseh vawleicung ram dang hna ASEAN ram hna nih thazang an pekmi a si.
Amak law law mi cu, number pakhatnak a si. Raltuknak vialte kah ngol dih ding timi kha a si. Kachin le Karen ram ah raltuk ruang ah mipi an tem ning Shan ram an ram tem ning cu chim rih lo. Communist ralhrang pawl ruang ah zei ai pehtlai lomi Asho Chin mi hna le Rakhine tlangcungmi hna an rak tuar ning hna kha tuanbia ah hin an tang. Communist ral hrang hna kha cu an rak um lo law law ding khi a si. Aherh lo ah, an mah ruang ah minung zeizat remruan dah an rak thi, thong an rak tla i, khuami an rak tem. Atu ah CNF nih kah ngolnak an vun tuahmi hi acaan le boruak an zoh i, Kawl cozah thar cawlcanghning le vawlei cung boruak, tlangcung mi dang hna boruak le hnatlaknak tbtk vun fumtom in, a chuak ti sih law palh si lai lo dah.
Piang ko in hei telh ve ding ah ai rem ngaimi thil cu ralkap nih pawta nan suai ti lai lo. Chin State cozah nih khuachung mi hramhram in rian nan fial hna lai lo, phaisa nan khawlh hna lai lo. Satil chawlet pawl an caw le na, vok le ar har le fe tein an cawk, an zuar mi tla hnguar in nan chut hna lai lo tbtk. hna hi Number (10nak) ah hei chap ding ah khin ai rem ngai hnga. Hmai lei ah ceih te ding in i chiah si rua.
Biadonghnak
Vawlei cung ram khat le khat kar ah siseh, Kawlram ramkhel boruak ah siseh bia-elawk um lengmang mi cu. "Arpi maw um hmasa, Arti" ti phun khi a si Nai ah, British cozah upa Kawlram ah a tlung i, ramkhel kong ah thongtla nan chuah taktak hna lo cun, business sanction kan thlah kho ve lai lo ti asi. Cu cu Pi Suu Kyi pomning zong a si. Mah hitiin thil kaap hnih in pipen thui in ai thui cuahmah lio ah hin, Kawlram mipi million (50) cu rawltam tuk ruang ah an thi an lo, an tlau cuahmah. Adang chia rih in, Chin State chung ah zoh tik ah rawltamnak, mangtam, rian um lo, paw cawm khim lo harnak a karh chinchin. Ngandamnak kong ah a hnu tuk cang, thanchonak caah fim cawnnak caah, a nuar cuahmah cang. Hi lio ah zei dah hnu, zei dah hmai zoh aherh ngai hrim cang. Arpi maw kan ser hma lai, arti dah. Pathian nih hin, catialtu zumhnak cu, Arpi hi rak ser hmasa tihi zumh asi ko. Zei ca tiah Arpi cu apical cang i, Arti a tit khawh cang. Arti cu a no rih i, api ai chuah ding ah ruahchanhnak atlawm ngai. Miphun puitling kan ser lai, kan thazang a thawng lai, ti ding caah hin 21st century hnu hin cun, economic thazang hi tahfung thabik ah si cang. Economic thazang um lo in mipi sifah le retheih, lotlau le pem nih miphun a den cuahmah ah cun revolution cu chim lo, khapkaht akau mi pawpi hmanh a khim ti lo, zei revolution dah ai tuah kho ti lai. Thanchonak or Economic thazang hi tulio boruak zoh chin in chim ah cun Chin miphun caah Arpi bantuk a si, ram sersiamnak cu Arti bantuk a si; duh sah duahmah in akeuh, athang, a hmur cawrh i, Arti ti kho mi Arpi ah ai chuah than. Tutan Chin miphun tuanbia thar tialnak hi, chim dai lo a si. CNF upa hna an khua ruah khawhnak le an riantuanning api cal ning hi zoh tik ah upat lo awk an tha hrimhrim lo. Khat lei ah Chin State cozah hna Chin miphun chung chuak te Pu Hung Ngai telh chin in dangdang hna, an khurkhua tuaknak nih roling tuanbia an tial khawh. Chin miphun tuanbia ah mah bantuk 'Hnatlaknak minthut' nihhin tuanbia a thlen lengmang aruang cu Chin miphun kan pu le nih an rak chimmi cahang an riin rawhmi kha, biatak in an lak i an rak i nunpi/thihpi caah asi. Chinland ram thangcho chin hram ,
PDF file ah kawlca minthut mi copy ka tuah kho lo ,Testnak si
Žádné komentáře:
Okomentovat