Kawlram Thongtla chuahni 13 January 2012

1988 kum  kawlram buailio thongtla an chuah nak kong,Lai forum Ah Lairam Thang ttialmi si. Hmailei ah cun ramkhel tuanbia ah abiapi asi te lai tiah ka fim mi si,Lomnak mithmai, hmanthlak hi ka fim duhmi si.

Luatnak Hi Man Lo In Hmuh khawh  A Si Rua Lo January 12 ni cu Kawlram ramrian tuan ruangah thongtla mi hna caah cun philh khawh ding a si lo. Luatnak an hmuh ni a si. 1988 khan kan ram rak i theng sehlaw Kawram hi a tu ahcun Vietnam, Indonesia le Philipine ram nak in a thangcho deuh ding a si cang. Kum 23 renglo kan caan vialte pakpalawng ah a chuah dih, kan ram a rawk, minung lungthin zong a rawk. Kum 23 renglo a rawk cangmi minung lungthin le kan ram cu fawi tein khawh a si lai lo. Ram hruaitu hna nih mipi hruai an i palh ahcun a hram in thawk than a herh an ti. Mah cucu atu Kawlram kan sining hi a si rua ka ti. Tlangcung mi hna caah zaukphung (democracy ) hmuh lawng in a za lai lo, a dikmi zaukphung le mahte tawlrel khawhnak (self-determination) kan hmuh lawngah tlangcung mi kan him lai. Luatnak le Zalonnak kan timi hi minung kan nunnak ah a biapi bik a si ko rua. Tlangcung mi hna nih kan hal lengmang mi hi Kawl mphun ta a si lo, kanmah nih kan rak ngeih cangmi kan ta kha kan laak than lai ti khi a si. General Aung San he pinlung an min kan rak thutning tein kan covo kan pe u, nan kan pek lo ahcun Kawlram in kan chuan lai tiah tlerh ding an si hnga. Tlangcung mi hna nih lungrual tein kan tlerh hna ahcun kan laak than khawh ko lai. SNLD Hruaitu Khun Thun Oo cu Shan miphun ca lawng ah si lo in, UNLD, UNA le tlang cungmi hna caah a nunnak a chawva tiang in a petu a si. Amah hi um hlah sehlaw UNLD le UNA riantuannak hma a kal kho hnga lo. Ramrian tuan ka peh lai tiah a chim. Tutan thong an chuahmi hna ah Shan Nationalities League for Democracy Party (SNLD) hruaitu U Khun Thun Oo, chungtuantu, Saing Ngunt Lwin le General Khin Ngunt le a fale, General Ne Win tufa le zong an i tel. 88 Chanchuak Sianghleirun Siangakchia Thong In An Chuak Kawl cozah nih a tih bikmi 88 chanchuak sianghleirun siangngakchia hna cu thong in an chuah cang hna. Min Ko Naing, Ko Ko Kyi, Ko Htay Kywe, Ko Mya Aye, Ko Min Yan Naung, Ko Jimmy, Ko Pyone Cho, Ko Ant Bwal Kyaw, Ni Lar Thein le a dang zong an i tel. Thazet Thonginn in a chuah lio a si. Sianghleiruan Siangngakchia dothlennak thantaar he thongah an rak don. A cunglei hmanthlak pawl hi thong chung a um lio ah Min Ko Naing nih a suaimi hna an si. A cunglei hmathlak pawl hi Thazet, Pyi le Rangoon ah a phak ah mipi sin ah bia a chim lio hmanthlak a si. Min Ko Naing cu Kawlram thongtla vialte lak ah minthang bik a si. Aung San Suu Kyi rian a changtu ding a si tah ruahmi zong a si. 88 lio All Burma Federation of Student Unions an dirh ah hotu ah an rak thim i, 88 buai lio ah sianghleiruan siangakchia vialte a kan hruaitu a si. Catial thiam a si, Biazai le Tan-chiat tial a thiam ngaingai mi a si. Rangoon Sianghleiruan a kai lio ah sainginn ekinn kip le vanpang kip ah a cozah dohnak biazai a tial. Thong in voi thumnak a chuah a si. Thong a tlak vialte relh dih ahcun kum 20 renglo si dawh a si. A tanglei te hi hmet ulaw, bia a chim lio zoh khawh a si. http://www.youtube.com/watch?v=Y0l2aObGA-M&feature=player_embedded 88 ABFSU Hotu chang A Rak Tuanmi Ko Ko Kyi Ko Ko Kyi a hngal deuhmi nih ramrian ruantu ding hrimrhim a si an ti. Ramrian lei ah a thluk a tli taktak mi a si i, amah thluak hi 88 lio ah tampi rak hman a si. Ram caah nunnak thap in a temtuar mi hna thawng in kannih nih luatnak kan hmuh. Luatnak kan timi hi temtuarnak um lo in hmuh khawh a si rua lo. A tanglei ah 88 ABFSU Chungtel Htay Kywe Hmanthlak A cunglei hmathlak ka taarmi Ko Htay Kywe hi 88 lawng si loin phungki pawl dohdalnak ah amah nih hnulei in an tawh a tlaitu hna a si. Phungki dodalhnak lio ah thla 3 deng a dup hnu ah cozah nih a dupnak hmun ah an tlaihmi a si. Min Ko Naing le Ko Ko Kyi an um lo ahcun amah hi hruaitu a si. 88 'Chanchuak "Ko Hla Myo Naung Hmanthlak Amah hi mi lunghak ngaingai mi a si. A mit hi a tha tuk lo i, cozah nih sibawi zong an rak pe duh lo, vawleicung in an au kanh caah cozah nih a hnu ah sibawi piaknak nawl an pek than. 88 Chanchuak Ko Pyone Cho   A nu le a pa nih an rak don, zeitluk in dah an i lawm lai, keimah hmanh an hman thlak ka hmuh ah ka lawm tuk. 88 Chanchuak Ko Jimmy le a nupi Ma Ni Lar Thein Hmanthlak Nuva in thongah an thlak hna A cunglei hmanthlak nupa farual hna hi Ko Jimmy le Ma Ni Lar Thein an si, an fate hi Phungki pawl dohdalnak tuah lio ah khan, an hrinmi a si, a nule le a pa thong i an thlak lio ah thla 3 lawng a si rih, kum thum hnu ah nupa farual an i tong, an tuabia ruah ah lung a fak ngeih a chia hringhren. Mipi caah nunnak thap tu hna cu upat lo awk an tha lo. 88 Chanchuak Ko Mya Aye   A cunglei hmanthlak Ko Mya Aye cu "Burma Campaign for UK "ah a tuanmi Waihhin Pwint Thone i a pa a si. General Khin Ngunt Amah le a chan ahcun a huaisem bakmi a si. Raltu bal lo, thohhlanzi in a kaimi a si nain Ne Win mithmai in Ralkap zong a tih lo, cozah dodaltu zong a tih hna lo, hriamtlaimi zong a tih hna lo, tihmi pakhat hmanh a ngei rua lo ti awk in rumra zong a ngeimi a si nain General Than Shwe nih zohchia ngai in a thlonghmi a si. Amah zong tutan ah a hung chuak ve i, ramrian tuan cu ka tim ti lo tiah thawngzamhtu hna sin ah a chim. A fapa le pahnih zong an chuah hna, a fanu vapa, kanmah Laipa tu cu a chuak rih rua lo. Ruamnak, Minthannak le Nawlngeihnak, hna hi zungzal a hmunmi an si lo, vawlei kan nunchung ah kanmah le kan chan cio ah ram caah a tha bik in tuanbia tial i zuam hna usih. Ram caah a tamtuartu hna upat peknak he ka van taarmi a si. Hmanthlak zohtu, careltu nan dihlak cungah ka lawm. Lawmhnak bia a chimtu nan dihlak cungah ka lawm. Nanmah hna tha peknak thawng in ka van i hnek tawnmi a si. Palh sualmi, tial sualmi a um ahcun keimah santlaih lo a si, a ruahzia ka thiam te u tiah kan nawl sia hna. Upatnak le Siaherhnak he, Salai Lairamthang ( Sungsung pa)